गुरु केवल देह होइनन्,
चेतनाको उज्यालो हो।
अज्ञानका अनन्त रातहरू चिर्दै,
आत्माको दिशामा उदाउने
गुरु पहिलो प्रभात हो।
जब जीवन प्रश्नहरूको मरुभूमि बन्छ,
जब मन आफ्नै छायासँग हराउँछ,
जब सत्य कुहिरोभित्र लुक्छ,
त्यही क्षण
गुरु मौन दीप हो।
गुरु-ज्ञानका शब्दहरू कण्ठ गराउनु होइन,
निदाएको आत्माको आकाशलाई
जागृत गराउनु हो।
अहंकारका कठोर पर्खालहरू गलाएर
प्रेमको नदी बगाउनु हो।
गुरु त्यो सूर्य हो
जसको प्रकाशले
भित्री अन्धकार हटाउँछ,
एउटा दृष्टिले
वर्षौँको भ्रम पग्लन थाल्छ,
एउटा मौनताले
हजारौँ ग्रन्थभन्दा गहिरो शिक्षा दिन्छ।
गुरु पूर्णिमा,
केवल पात्रोको एउटा तिथि होइन,
यो त चेतनाको पर्व हो।
जहाँ मनको अमावस्या हराउँछ,
र आत्माको चन्द्रमा
पूर्णताका साथ उदाउँछ।
यसैले,
गुरु-प्रेम-पूजा हो,
गुरु-करुणा-धर्म हो,
गुरु-सजग-साधना हो,
गुरु-मौन-वेद हो।
गुरु-नभको आकाश हो,
गुरु-श्वासको गहिराइ हो
गुरु-जागरण प्रकाश हो.
गुरु-होशपूर्ण वर्तमानको अनुभूति हो।
आज गुरु पूर्णिमाको शुभ अवसरमा
मन-सत्यको पात्र बनोस्,
वाणी-करुणाको स्वर बनोस्।
कर्म-मानवताका लागि समर्पित बनोस्।
चेतना-सधैं गुरुको प्रकाशमा स्नान गरोस्।
किनकि गुरुको महिमा
शब्दले कहिल्यै अटाउँदैन,
गुरु त अनन्त आकाश हो
जहाँ ज्ञान सूर्य बनेर उदाउँछ,
प्रेम गङ्गा बनेर बग्छ,
र चेतना
आजको पूर्णिमाको चन्द्रमाझैँ
अनन्त उज्यालोमा विलीन हुन्छ।
दियालो मासिक 