तिमी प्रेम भन्छौ,
म प्रेम गर्छु,
तर पनि समाज प्रेमलाई घृणा गर्छ!
किन त..?
प्रेम त ईश्वरको वरदान हो,
प्रेम त स्व-बोधको अनुभूति हो,
प्रेम त आफैंलाई चिन्ने प्रक्रिया हो,
प्रेम त जीवनको पहिलो सिर्जना हो,
यसैले त तिमी प्रेम भन्छौ
म प्रेम गर्छु
तर पनि समाज प्रेमलाई घृणा गर्छ।
किन त..?
स्वार्थभित्र लुकेको हुँदैन- प्रेम
घृणाभित्र दबेको हुँदैन- प्रेम
तेरो र मेरोको अहंकारमा हुर्केको हुँदैन- प्रेम
निश्चलताको हाँसोमा बग्छ- प्रेम
बालकको किलकारिमा झल्कन्छ- प्रेम
यसैले त तिमी प्रेम भन्छौ
म प्रेम गर्छु
तर पनि समाज प्रेमलाई घृणा गर्छ,
किन त..?
सायद तिम्रो र मेरो प्रेमको परिभाषा एकै हुन सक्छ,
तर, समाजको प्रेमको परिभाषा फरक हुनु पर्छ,
भ्रम दृष्टिले प्रेमलाई नियाल्दा
प्रेमको परिभाषा घृणा बनिदिन्छ
तै पनि तिमी प्रेम गर्छौ
म प्रेम गर्छु
तर पनि
समाज प्रेमलाई घृणा गर्छ।
किन त…?
