म ज्ञानी होइन,
म त जीवनको खुला पानामा,
हरेक पल नयाँ पाठ सिक्दै गरेको,
एउटा पाठक हुँ,
बेहोसी भित्र होश खोज्दै
रुमलिरहेको म एक जिज्ञासु हुँ,
यसैले,
म ज्ञानी होइन!
मलाई केहि थाहा छैन ,
भन्ने थाहा छ मलाई,
न त आफैलाई मुट्ठीमा कैद गरेकी छु,
न त मुट्ठी खोलेर आजाद गरेकी छु,
आफैँभित्रको अज्ञानता नियाल्दै,
पल-पलमा आफैलाई हेर्दै छु,
यसैले,
म ज्ञानी होइन!
जुन दिन मैले ‘म अज्ञानी’ भन्ने थाहा पाए,
त्यसै दिन ज्ञानले ढोका थपथपायो,
जुन दिन ‘म’ को अहङ्कार मुस्कुरायो,
त्यसै दिन अस्तित्वको बोध जुर्मुरायो
यसैले,
म ज्ञानी होइन!
वरिपरि छरिएका ज्ञानीका भीडमा,
ज्ञान भन्दा परको शब्द खोज्दै छु,
त्यही शब्दको मौनता भित्र,
अज्ञानताको मिठास चाख्दै छु,
यसैले,
म ज्ञानी होइन!
किनकि, ज्ञानले अहङ्कार बढाउँछ भने
अज्ञानी हुनु मै बाच्नु छ,
अज्ञानले विनम्रता, प्रेम र शान्ति जगाउँछ भने,
अझ अज्ञानको परिधि बढाउनु छ,
यसैले,
म ज्ञानी होइन!
अत:,
मलाई ज्ञानी बन्नु छैन,
ज्ञानीहरुको मपाइमा रम्नु छैन,
जे छु, त्यसलाई पूर्ण “आदेश”मा छु,
यही क्षण जीवन स्वयंमा छु,
यसैले,
म ज्ञानी होइन!
