दया यति गर श्री हरि
दया यति गर श्री हरि ।
तिम्रा सुस्तरी पदचापहरु
नभुलिने गरी गन्न सकुँ म
बसन्तका पालुवाले झैँ
तिम्रा टेकाई चुम्न सकुँ म ।
तिमीले ओडाउने आकासका
घुम्टोभरि अटाउन सकुँ म
तिमीले फिँजाएका धर्तिभरि
लडिबुडी सयन गर्न सकुँ म ।
दया यति गर श्री हरि
दया यति गर श्री हरि ।
तिमीले खटाएका ऋषिहरू
सधैं सुनिरहन टिकुँ म
तीनले औंलाएका पथहरु
सधैं पहिल्याइरहन सकुँ म ।
संगीत कला र साहित्यमा
मस्त झुमिरहन सकुँ म
तिमीले सिर्जेका प्रकृतिमा
सधैं फक्रिरहन सकुँ म ।
दया यति गर श्री हरि
दया यति गर श्री हरि ।
दियालो मासिक 